Search

BB dhe Instituti i Vjenës me parashikime të ndryshme për Shqipërinë

Banka Botërore (BB) dhe Instituti i Vjenës për Studime Ekonomike janë të ndarë në lidhje me rritjen ekonomike të Shqipërisë në dy vitet e ardhshme, por më optimiste nga të gjithë tregohet Qeveria shqiptare.

Instituti i Vjenës parashikon se Shqipëria do të jetë një nga tre vendet me rritjen më të shpejtë ekonomike në Evropën Qendrore dhe Lindore gjatë dy viteve të ardhshme me rreth 4 për qind.

Vetë Qeveria është zotuar për një rritje mesatare prej 4.5 për qind në katër vitet e mandatit, por deri tani të gjitha parashikimet e institucioneve ndërkombëtare, përfshirë ato më optimistet, nuk e kalojnë kufirin e 4 për qind.

Megjithatë kaq mjafton që sipas Institutit të Vjenës, Shqipëria të renditet pas Rumanisë dhe Turqisë në listën me 22 vende të Evropës Qendrore dhe Lindore. Ky Institut, një nga institucionet më prestigjoze për kërkimet dhe analizat financiare, vlerëson se të gjitha ekonomitë në zhvillim të Evropës Lindore po përjetojnë një moment pozitiv, falë edhe situatës së mirë ekonomike të Eurozonës.

Sipas Institutit, kjo spirale pozitive do të vazhdojë të paktën edhe në dy vitet e ardhshme. Perspektiva pozitive e ekonomisë europiane konfirmohet edhe nga BB. Por në lidhje me Shqipërinë, banka ka një parashikim më pak optimist se sa Instituti i Vjenës. Në raportin e fundit të Perspektivës Botërore, BB ka ruajtur të njëjtin parashikim për rritjen ekonomike të Shqipërisë, që gjatë këtij viti do të jetë 3.6 për qind, ndërsa vitin e ardhshëm 3.5 për qind.