Gazeta Ekonomia

Kupto Ekonominë

BQK dhe MPB me marrëveshje për sigurinë në banka

Guvernatori i Bankës Qendrore të Kosovës (BQK), Fehmi Mehmeti, ka nënshkruar marrëveshje të bashkëpunimit me ministrin e Punëve të Brendshme (MPB), Ekrem Mustafa, drejtorin e Policisë së Kosovës, Rashit Qalaj dhe drejtorin Ekzekutiv të Shoqatës së Bankave të Kosovës, Petrit Balija.

Sipas BQK-së, kjo marrëveshje u nënshkrua si rezultat i takimeve të mëhershme të zhvilluara me përfaqësues të këtyre institucioneve, në të cilat u diskutua për shqetësimet rreth dukurisë së plaçkitjes së institucioneve financiare në Kosovë.

“Marrëveshja ka për qëllim avancimin e bashkëpunimit për ngritjen e nivelit të sigurisë në sektorin bankar në mënyrë që bankat, personeli i tyre dhe qytetarët të kenë një ambient sa më të sigurt për zhvillimin e aktivitetit të tyre”, thuhet në njoftimin e BQK0-së.

Me këtë rast, Mehmeti ka falënderuar institucionet e angazhuara në arritjen e kësaj marrëveshjeje për bashkëpunimin dhe masat e ndërmarra me qëllim të ofrimit të një ambienti më të sigurt për institucionet financiare që operojnë në Kosovë. /Gazeta Ekonomia/