Gazeta Ekonomia

Kupto Ekonominë

Donald Trump kërcënon Turqinë me shkatërrim ekonomik

Përplasja mes Shteteve të Bashkuara të Amerikës dhe Turqisë për mënyrën e veprimit në Siri ka kaluar në një raund të ri. Pas kërcënimit të ashpër të presidentit Donald Trump, Turqia paralajmëron Shtetet e Bashkuara të Amerikës nga bashkëpunimi me terroristët.

Qeveria turke ka reaguar të hënën ashpër pas sulmit verbal të presidentit amerikan, Donald Trump në fundjavë.

“Turqia planifikon edhe më tej, pavarësisht kërcënimeve nga pala amerikane të veprojë kundër Njësive kurde të Mbrojtjes (YPG)”, deklaroi Ibrahim Kalin, zëdhënës i presidentit turk, Recep Tayyip Erdogan përmes rrjetit social Twitter.

Organizata YPG nga njëra anë ndodhet në listën e terrorit të Turqisë, nga ana tjetër është aleate e Shteteve të Bashkuara të Amerikës në luftë kundër milicëve xhihadistë të ‘Shtetit Islamik’.

Sipas Kalin për Turqinë ‘nuk ka dallim’ mes YPG-së dhe milicëve të ‘Shtetit Islamik’. Ai paralajmëroi Shtetet e Bashkuara të Amerikës se “terroristët nuk mund të jenë partnerët dhe aleatët tuaj”.

Turqia pret nga Shtetet e Bashkuara të Amerikës respektimin e partneritetit strategjik. Marrëdhënia mes tyre nuk duhet të errësohet nga propaganda terroriste.

Sfondi i kësaj përplasjeje të re është një mesazh i publikuar nga presidenti Trump në Twitter, ku ai e kërcënon Turqinë me shkatërrim ekonomik, nëse ajo sulmon kurdët në Siri.

“Në të njëjtën kohë as nuk dua që kurdët të provokojnë Turqinë”, shtoi Trump në një mesazh tjetër.

Ai bëri fjalë për krijimin e një zone të sigurisë prej 20 miljesh, rreth 32 kilometra, por nuk dha të dhëna konkrete.

Në muajin dhjetor 2018, presidenti amerikan bëri papritur të ditur, se do të tërhiqen trupat amerikane nga Siria. Ky hap dobëson milicët kurdë që luftuan krah Shteteve të Bashkuara të Amerikës kundër ‘Shtetit Islamik’.

YPG i trembet një sulmi nga ana e Turqisë. Qeveria e Ankarasë i sheh luftëtarët kurdë si krahun e zgjatur të Partisë së ndaluar Punëtore kurde (PKK). Erdogan ka bërë të ditur, se do të ndërhyjë shumë shpejt për të ‘neutralizuar këtë organizatë terroriste në truallin sirian’.

Këshilltari i Trumpit për sigurinë, John Bolton, i cili qëndroi në Turqi para pak ditësh e lidhi tërheqjen e trupave amerikane me garancitë turke për sigurinë e milicëve kurdë. Por kjo u refuzua ashpër nga Ankaraja.

Në fundjavë Turqia forcoi trupat në kufi me provincën sirianoveriore, Idlib. Qarqet turke të sigurisë nuk donin të shpreheshin, nëse kjo mund të kuptohet si shenjë e përgatitjes së misionit ushtarak. /Deutsche Welle/