Gazeta Ekonomia

Kupto Ekonominë

Shpallen fituesit e Çmimit Nobel në Ekonomi për vitin 2019, ndihmuan për zbutjen e varfërisë botërore

Çmimi Nobel në Shkencat Ekonomike për vitin 2019 u është dhënë Abhijit Banerjee, Esther Duflo dhe Michael Kremer, për punën e tyre në zbutjen e varfërisë botërore.

Suksesi i Duflos do të thotë që ne kemi një fituese të dytë femër për këtë çmim, 50 vjet pasi u dha për herë të parë, përcjell Telegrafi.

Gjetjet e hulumtimit të saj kanë përmirësuar në mënyrë dramatike aftësinë tonë për të luftuar varfërinë në praktikë. Si rezultat i një prej studimeve të tyre, më shumë se pesë milionë fëmijë indianë kanë përfituar nga programet e mësimit në shkolla.

Laureatët Banerjee dhe Duflo, shpesh me Michael Kremer, së bashku kanë kryer studime të ngjashme për çështje të tjera dhe në vende të tjera, përfshirë Indinë.

Metodat e tyre të kërkimit eksperimental tani mbizotërojnë tërësisht në ekonominë e zhvillimit.

Në mesin e viteve 1990, Kremer dhe kolegët e tij demonstruan se sa e fuqishme mund të jetë një qasje e bazuar në eksperiment, duke përdorur eksperimente në terren për të provuar një sërë ndërhyrjesh që mund të përmirësojnë rezultatet e shkollës në Kenian Perëndimore.

“Hulumtimi i kryer nga këta ekonomistë ka përmirësuar ndjeshëm aftësinë tonë për të luftuar varfërinë botërore. Në vetëm dy dekada, qasja e tyre e re e bazuar në eksperimente ka transformuar ekonominë e zhvillimit”, tha Akademia suedeze e Shkencave.

Treshja fituese e çmimit do të ndajnë shpërblimin prej rreth 908 mijë dollarësh amerikanë.

Javën e kaluar, në Stokholm u ndanë edhe çmimet Nobel për Letërsi, Mjekësi, Fizikë, Kimi dhe Paqe.