Gazeta Ekonomia

kupto ekonominë

Kryeministri Kurti largon pjesërisht tarifën 100 për qind

Qeveria e Kosovës ka miratuar vendimin për heqjen e tarifës për importin e lëndës së parë nga Serbia dhe Bosnja e Hercegovina.

Kryeministri Albin Kurti ka shkruar në Facebook se, “u votua me 10 vota për dhe 2 abstenime vendimi për të liruar nga tarifa 100 për qind importin e lëndës së parë nga Serbia dhe Bosnja e Hercegovina”.

Ai ka sqaruar se nga mesnata do të hapen gjashtë pikat kufitare mes Kosovës dhe Serbisë, 1, 31, 3, 4, 5 dhe 6, për importimin e lëndës së parë. Kurse, deri më 1 prill Qeveria e Kosovës do të nxjerrë një vendim tjetër për vënien e masave të reciprocitetit në vend të tarifës 100 për qind.

Vendimi i qeverisë dhe kryeministrit Kurti, paraqet hapin e parë drejt shfuqizimit të plotë të tarifës 100 për qind ndaj importeve nga Serbia e Bosnja e Hercegovina që pason edhe thirrjet e vazhdueshme të Shteteve të Bashkuara të Amerikës dhe Bashkimit Evropian.

Në harmoni me kërkesën e tyre, është edhe ajo e Lidhjes Demokratike të Kosovës, parti brenda koalicionit aktual qeverisës që ka kërkuar heqjen, jo të pjesshme, por të plotë të tarifës.

Lidhja Demokrarike është në proces të nxjerrjes në votim të mocionit të mosbesimit ndaj qeverisë, të cilës i përket edhe vet, me kërkesën për rrëzimin e saj me votat e Kuvendit, përkatësisht opozitës.

Tarifën 100 për qind e kishte vendosur qeveria e kaluar e Kosovës, e ish-kryeministrit Ramush Haradinaj, në nëntor të vitit 2018. Që nga ajo kohë, dialogu në mes Kosovës dhe Serbisë ishte ndërprerë, çka edhe u pasua me kërkesat e vazhdueshme të Uashingtonit e Brukselit për heqjen e kësaj mase.

Ndër të parët që ka reaguar dhe kundërshtuar vendimin e Qeverisë Kurti, ishte ish-kryeministri Ramush Haradinaj, i cili nga fillimi ka qene kundër shfuqizimit të tarifës 100 për qind.

Në planin e Kurtit, tarifa për lëndën e parë do të duhej të hiqej qysh më 15 mars, por edhe atëherë, partia partnere në koalicionin qeverisës, Lidhja Demokratike nuk ishte pajtuar, duke insistuar që tarifa të shquqizohet në tërësi. Kurti kishte deklaruar se nëse Serbia ndalë fushatën për çnjohje dhe zotohet për heqjen e barrierave jotarifkore, brenda 15 ditëve, tarifa do të hiqej për një periudhë 90 ditëshe. Nëse Serbia nuk i përmbahet këtyre zotimeve, sipas Kurtit, nga 15 qershori, do të rivendosej taksa 100 për qind dhe do të zbatohet parimi i reciprocitetit.

Megjithatë, Shtetet e Bashkuara kanë kundërshtuar këtë plan, duke kërkuar heqjen e tarifës pa kushte. Madje, i dërguari i Shtëpisë së Bardhë për dialogun Kosovë-Serbi, Richard Grenell e kishte cilësuar “gabim serioz” nëse Kosova heqë taksën pjesshëm, ashtu siç ka propozuar Kurti.

Zyrtarët në Shtetet e Bashkuara, po ashtu paralajmëruan tërheqjen e trupave amerikane nga Kosova, nëse qeveria në Prishtinë nuk heq tarifat pa kushte.

Ishte senatori amerikan, David Perdue, i cili tha se nëse Kosova nuk heq taksën, Shetet e Bashkuara duhet ta shqyrtojë mundësinë e tërheqjes së trupave nga Kosova.

“Për më shumë se dy dekada, forcat amerikane kanë ndihmuar në ruajtjen e paqes mes Kosovës dhe Serbisë. Tani, me përparimin e bërë historik, Kosova duhet të bëjë pjesën e vet dhe të shfuqizojë të gjitha tarifat e vendosura ndaj Serbisë. Nëse Kosova nuk është plotësisht e përkushtuar për paqe, atëherë Shtetet e Bashkuara duhet të rishqyrtojë praninë e saj atje”, ka shkruar a senatori Perdue.

Kjo deklaratë e senatorit Perdue u mbështet nga Grenell dhe nga zyrtarë të tjerë amerikanë.

Po ashtu, Korporata e Sfidës së Mijëvjeçarit, ka konfirmuar se ka pezulluar programe të zhvillimit ekonomik për Kosovën. /Gazeta Ekonomia/