Gazeta Ekonomia

kupto ekonominë

Shëndeti publik, vendet e punës dhe qëndrueshmëria fiskale – prioritet e Bashkimit Evropian pas pandemisë së COVID-19

Vendet e Bashkimit Evropian duhet të fokusohen tek investimet në shëndetin publik, ruajtjen e vendeve të punës, kompanive dhe qëndrueshmërinë fiskale.

Në rekomandimet vjetore për 27 vendet anëtare, të quajtura Semestri Evropian, krahu ekzekutiv i Bashkimit Evropian deklaroi se blloku duhet të koordinojë qasjen e tij ndaj rimëkëmbjes ekonomike sapo pandemia e Coronavirusit të jetë zhdukur.

“Semestri Evropian është ripunuar dhe është bërë më efikas për të udhëhequr dhe mbështetur shtetet për fazën aktuale dhe atë të ardhshme të krizës. Prioritetet urgjente përfshijnë investimin në shëndetësi, ruajtjen e vendeve të punës, sigurimi që kompanitë të kenë mjaftueshëm likuiditet dhe frenimi i ndikimit në shoqëri”, tha zëvendëspresidenti i Komisionit Evropian, Vladis Dombrovskis.

Ndërsa komisionari për Çështjet Ekonomike dhe Financiare, Paolo Gentiloni tha se gjatë fazës së rimëkëmbjes, investimet dhe reformat duhet të fokusohen tek tranzicioni i gjelbër dhe ai dixhital, si dhe tek garantimi i të drejtave sociale.

“Rekomandimet tona shkojnë së pari për sfidat imediate me të cilat përballemi si rezultat i pandemisë, si përforcimi i kujdesit shëndetësor, mbështetja e punëtorëve dhe shpëtimi i kompanive. Në të njëjtën kohë, sfidat me të cilat përballeshim më parë nuk janë zhdukur. Klima ende po vuan dhe ambienti ynë ende ndihet keq”, tha Gentiloni.

Hendeqet buxhetore në të gjitha vendet e BE-së me përjashtim të Bullgarisë do të zgjerohen përtej limitit prej 3 për qind të Prodhimit të Brendshëm Bruto, teksa qeveritë po i përdorin paratë publike për të ngritur ekonomitë që pritet të pësojnë rënien më të thellë të këtij viti.