Gazeta Ekonomia

kupto ekonominë

Shtetet e Bashkuara vendosin sanksione ndaj anijes ruse ‘Fortuna’ në projektin e gazsjellësit ‘Nord Stream II’

Shtetet e Bashkuara të Amerikës kanë informuar zyrtarët gjermanë se kanë vendosur sanksione në anijen ruse për vendosjen e tubave të gazit “Fortuna”, e përfshirë në ndërtimin e tubacionit “Nord Stream II”.

Administrata e presidentit Donald Trump e ka njoftuar Berlinin dhe kryeqytetet e tjera evropiane se më 19 janar do të hyjnë në fuqi sanksionet mbi këtë kompani nën legjislacionin ekzistues të njohur si CAATSA, përcjell Telegrafi.

Sanksionet do të ndëshkojnë çdo kompani evropiane që ndihmon “Fortuna” në projektin “Nord Stream II”, i cili është krijuar për të transportuar gaz natyror nga Rusia në Gjermani përmes Detit Baltik.

Shtetet e Bashkuara e kundërshtojnë projektin, duke pretenduar se ai do të forconte kontrollin e Kremlinit në tregun evropian të energjisë, ndërsa minonte sigurinë dhe ekonominë e Ukrainës.

Po ashtu, në fillim të muajit janar, një kontraktor norvegjez në “Nord Stream II” ka refuzuar të mbështesë projektin e tubacionit të gazit të drejtuar nga Gazpromi rus.

Det Norske Veritas – Germanischer Lloyd (DNV GL), i cili është i ngarkuar me procedurat e verifikimit, kishte konfirmuar se ka ndaluar punën në gazsjellës.

Ligjvënësit amerikanë janë pajtuar të zgjerojnë sanksionet ndaj kompanive të përfshira në tubacionin e gazit “Nord Stream II”, pasi Gazprom e udhëhequr nga Rusia u zotua se do të rifillojë punimet, një vit pasi ishte ndërprerë ajo.

Më 2 dhjetor të vitit të kaluar, Shtetet e Bashkuara të Amerikës vendosen sanksione ndaj kompanive që nuk hoqën dorë nga projekti i “Nord Stream II”.

Si dhe SHBA-ja ashtu dhe Polonia e Ukraina janë kundër ndërtimit, duke thënë se projekti do t’i japë Moskës një avantazh mbi Gjermaninë.